小東 的个人资料東東的閒情日誌照片日志列表更多  |  工具 帮助 |
|
東東的閒情日誌我係一隻活潑可愛的松鼠狗 5月3日 誰吵醒了誰琴日(2號)朝早四點幾，爸爸、媽媽喺睡夢中畀我嘅兩聲尖叫聲嚇醒。
 冇戴眼鏡嘅媽媽摸黑望落床下底，隱約睇到喺牛仔褲上打側瞓嘅我伸直晒手腳，冇晒反應咁，而嘴角附近嘅牛仔褲上有一笪白色嘅嘢，媽媽以為我嘔白泡。於是爸爸落床開咗房燈，媽媽就即刻戴番副眼鏡，先至知道原來嗰笪白色嘅嘢咁啱係牛仔褲淺咗色嘅地方。
 爸爸不斷咁拍我，我終於慢慢喺睡夢中轉醒。半夜三更，擾狗清夢，該當何罪？於是我還以顏色，吠咗爸爸幾嘢。唔知係咪維持咗呢個姿勢太耐，我個身有啲僵硬，加上我半夢半醒嘅神態，令到爸爸、媽媽有啲擔心，因為我細個嘅時候都試過半夜尖叫，然後氣若氣柔絲，元氣大傷。
 之不過今次嘅情況同以前有啲唔同，以前嘅尖叫聲多數係喺好凍嘅冬天裡面發生，而且嗰種叫法亦都同以前唔同。但係今次嘅叫法亦都唔係平時我發開口夢時嘅叫法，媽媽為妨有誤，幫我喺條頸度搓咗一陣間，又叫我起身行吓，好彩完全冇問題。
 呢個時候，我已經完全清醒，當然唔放過媽媽，又要嗲佢，又要佢抱。媽媽為咗唔妨礙爸爸休息(因為爸爸醒咗好難先瞓得番)，於是帶埋我出廳玩陣，然後媽媽矇矇矓矓咁喺梳化上瞓咗，而我梗係陪伴左右喇。不過就難為咗爸爸，當爸爸用咗好耐時間先可以瞓得著時，床頭嘅鬧鐘冇耐就響，又係時候要返工嘞。  4月3日 原來我是一隻貓今晚爸爸同媽媽去咗寵物店為我同老友Happy買Frontline杜蟲藥，以下是當時的情形：
爸爸問職員：唔該有冇Frontline呀？
職員答：有。你嗰隻係貓定狗呀？
爸爸毫不遲疑答：貓。
媽媽立即更正道：狗。
然後媽媽狂笑。 4月1日 愚人節快樂！！！嘩，數下手指，原來我已經足足三個月冇同大家見面，係咪好掛住我呢？？？
 咁啱今日係愚人節，首先祝大家愚人節快樂！！！
 另外，今日都係爸爸、媽媽嘅四周年結婚紀念日，喺呢度祝佢哋永遠都咁甜蜜恩愛。
 最緊要整多啲好嘢畀我食，爸爸就唔好再成日同我格鬥嘞。
 喺呢三個月入面，我做過啲乜？咪依然都係吃喝玩樂囉。
 仲有，試過哽嚫兩次，兩次都係媽媽發現救咗我小命。
其中一次，仲畀爸爸以為我喺度痕添，真係畀佢激死。
 1月1日 元旦快樂呢個聖誕同新年我好開心呀，因為爸爸、媽媽帶咗我去兩個parties玩呀。
首先就係Boxing Day，爸爸、媽媽帶我去公公度玩呀，仲有死黨Happy，不過佢似乎唔太理我，見到我都走夾唔唞，我唔係咁得人驚啫
 。不過好彩仲有好多美食，火腿、雞肉串、鴨胸等等，爸爸、媽媽話返到屋企可以慳番一罐西莎喎。另外，啱啱過咗嘅星期六(29號)，爸爸、媽媽帶我去另外一個party呀，就係tabo嘅入伙party，我見到tabo好開心呀，係咁追住佢，因為我哋好耐冇見嘞。我由廳追到去房，由房追到去廚房；有時tabo跳上張凳度，我跳唔到上去，就會喺凳底吠佢，不知幾開心。
不過爸爸、媽媽間唔使就捉住我，唔畀我落地。仲有，有個叔叔送pizza嚟時，我竟然一個箭步奪門而出，嚇到媽媽即刻衝咗出嚟捉住我，好彩我當時冇入到，如果唔係，媽媽話唔知點算喎。  11月24日 我爭啲哽死呀今晚爸爸、媽媽煲咗牛尾湯通粉嚟食，當然點少得我嗰份吖。嘩，啲牛尾肉真係好好味呀，
冇幾耐媽媽好開心咁畀咗一嚿軟骨我食，仲話我發達嘞，我擒擒青想喺地板上即席開餐，點知畀媽媽話，叫我返番去膠墊上先好食，我惟有乖乖地擔住嚿軟骨行去膠墊度。咬吓咬吓，咦，點解咁韌嘅，咬極都好似咬唔開，於是諗不如咕一聲吞咗落去先算喇，點知就係咁卡住咗喺喉嚨唔上唔落呀。
弊，我嘔又嘔唔出，仲開始感覺呼吸有啲困難，但係我又叫唔出聲，爸爸、媽媽仲睇電視睇到笑到哈哈聲，我頂唔順嘞，成隻狗打側瞓咗喺度抽搐，就喺呢個時候，媽媽走咗過嚟救我。原來佢畀我隻腳拍打地下嘅怪聲吸引咗，以為我又痕到拍拍聲，點知喺佢坐嗰個位度淨係望見我打橫伸出嘅後腳喺度郁，佢心知不妙，以為我病發呀(細個時我成日暈低)，於是即刻走過嚟，發現我係哽嚫呀。佢一邊話「東東，你唔好嚇我呀」，一邊扶番我起身，然後係咁搓我後頸嘅位置，我亦都努力嘗試反芻，最後終於成功吐番嚿軟骨出嚟，但係我已經筋疲力盡，打側瞓咗喺度。
媽媽於是抱我入懷，加以安撫，我條氣先至順番晒，回復活潑可愛嘅樣貌。然後我當然係繼續努力食嘢喇。  11月23日 陷阱琴晚媽媽整咗粟米肉粒飯做晚餐，為食嘅我當然都唔執輸喇，不過唔知係咪食得多得滯，定係我直腸直肚，食完之後人有三急——唔係，係狗有三急想開大，眼見仲未夠鐘落街，點算好呢？於是襯爸爸、媽媽睇電視睇得興起之際，我偷偷地喺廁所對出的位置解決我嘅生理所需，當堂舒服晒，然後靜雞雞行番去爸爸、媽媽附近。
冇幾耐，爸爸離開咗張梳化，諗住入房玩電腦，就喺呢個時候，聽到爸爸慘叫一聲，原來佢中咗招呀，一腳踩咗落我啲臭臭度，哈哈，佢都有今日嘞；而媽媽就擺出一副事不關己嘅樣出嚟不特止，仲喺度幸災樂禍笑爸爸添。 |
||||
发送私人消息
订阅 RSS 源
告诉朋友
添加到 Live.com
添加至您的网络
订阅提醒
|
|
